No ne podi propi pu
Senti
el coeur che salta su
Pataticc e patatacch
Devi propi svoià 'l sacch
Quand el coeur l'è propi pien
E'l va dré a
sgigottà
Se po minga fan a men
Se non parla el dev sciopà
Permettém o bona gent
Quatter vers in meneghin
Che ve
disa el me content
Nel trovam incoeu vesin,
Al nost car Commendator
L'illustrissim scior Pasqual
Proclamaa,
con tanti onor,
Cittadino de Gargall
El prim dì che l'ho incontraa
L'é staa on po' de ann
indrée
Quand a Caglio lu 'l m'ha faa
De Patrin al Giubilée
M'é bastaa 'l so bel soriss
Inscì sciasser e
sincer
Per sentim de bott amis;
E toccand con lu 'l biccier,
Ver la fin de la cenetta
Con el coeur ch'el me
sgambetta
Ghe protesti: "Mi e lu
Se lassarem mai pu!"
E sem semper voruu ben
Mei ammò de du fradei
E sem
ndaa d'accord in pien
Come sciger e budei.
Me se faa vorégh no ben,
Se po minga fan a men:
Gìrel,
vòltel mé te voeur
te ghé troeuvet on gran coeur
Quand ho vist instamattina
El Consili in gran complett
Col
Scior Sindegh che in marsina
Ghe leggeva el gran decrett,
Tra i evviva e battiman,
Ve confessi, porco can,
M'é
vegnuu comé on magon
Squas de piang per commozion
L'era degn de sto regal
El carisim nostr'amis
Che
domà sentì: "Gargall"
El se lecca anch'i barbis
Dolz de coeur, gentil, cortes,
Largh de man con chichessia,
Per amor di gargalles,
I calzon impegnaria
Quanto ben l'ha seminaa
In sta bella cittadina
Senza mai mett giò
stuaa
Ma quiett quiett squas in sordina.
El bev minga,el cicca no
El gh'a minga grill in co
E inscì al post di sòlet vizzi
Lu 'l se sfoga in benefizzi
Quand se tratta de fa 'l ben
Se po dì: 'l ghe tetta den;
E ch'inscì
mi vosaria
"Questa l'è democrazia"
Oh lassémel propi dì
Che en coeur d'or comè queschì
L'è dificil
de trovà
Gnanca in scima al Canadà
Ma guardél el nostr'omett:
Che simpategh moretton
Che impagabil
sorriset
Quand te fissa coi oggion!
De cavei l'è on po' grisott,
E per quanto rotondott
L'è nmò viscor
mè un usell
Forsi mei d'on quai pivell.
Quant s'è accort che la trippetta
La cresseva a tutt'andà,
Per
tegniss in etichetta
El se mis a cavalcà
Maestos ed imponent
A caval d'on bel sorian
Lu 'l galoppa com'el vent
Via
Caglio per Sorman
O mièe ben fortunaa
Del marì che ghè toccaa!
Van d'accord che
l'è on piasé
Ma l'è bona tanto an lee
Al vedè tant onoraa
El so caro Pasqualin
Lè l'è tuta emozionaa
Dai
calzett fin'al coppin
Però 'ndemm... quel cardanell
Lu 'l ghe ruga on ciccinin
E ghe pesa
mé 'n tarell
Benchè 'l sia on borsalin
Tutta colpa de la sciora
Che s'è miss in cappelin
Con on mazz de fior
desora
Che ghè fa de... balducchin
On evviva all'Onorari
Cittadino de Gargall
E agli insigni luminari
Radunaa
per festeggial,
Prim fra tucc al Scior Prefett
Gentilom e gran talent
Che l'ha
provocaa 'l decrett
E col coeur l'è chi present
Tutti stretti intorn'a on piatt
Ecco chi content me i ratt
Ben du
sindegh, che onor!
Coi collega assesor
E diversi Maresciai
Coi mostrin, senz'i strivai,
Scior Bariatti,
rinomaa
President del Sindacaa
Avvocat ed ingenier
E geometra e dottor
Gentilissim cavalier
E on
insign Provveditor
Vedi chi 'l dottor Caccìa
President di pensionaa,
Col scior sindegh
De Mattia,
On Cagliese spettasciaa
Gesuita, professor
On poètta, o che bellezza!
Ed insema on Ispettor
General
de Sicurezza
Non che manca nella lista
On reporter giornalista
Che on quaicoss a
nost riguard
El dirà peu sul "Lombard"
Ed on ospit propo scìcch
Devi pur chi ricordà:
On Rettore
Magnifich
De la Università
Grand amis del Festeggìaa
Dappertutt tant nominaa
Propi lu, nè pu
nè men:
Professor, sì, Cattaben
E fra tutti in compagnia
(Ma chi mai la disaria!)
Chè anch'on
Conte, no di ball
Che ghe disen: di tre vall
E son mi, porco sciampin,
che ve parli da visin:
Propi mi, Monscior
del Dom
Che fa rima con... pover om!
E adess basta. Su 'l biccier
Rinfreschem el canaruzz
Anca vialter
dell'Abruzz
E brindèm a coeur sincer
Al Scior Màssimi Pasqual
Cittadino de Gargall
Tanti, tanti compliment
E
l'auguri propi ardent:
"La conservi anmò 'l Signor
Per tant'ann al nostr'amor
Sempr'in
gamba, orca sibretta
Sempr'allegher e seren
Fin'a quand nas e basletta
Tra
de lor taccaran den".
Monscior G. Cereda
poètta a spass