2.2
Su carculu cumbinatoriu est istadu imbentau e s'est irviluppau de paris passu cun su carculu de sas probabilidades. A ddue penzare bene si sa definizione classica de probabilidade pretendiat chi sa probabilidade de unu eventu esseret su rapportu tra su numeru de sos casos favorevoles a s'eventu e totu sos casos possibiles, custos arrechedian de esser contaos de una orta a s’atera. A custa faina si prestat su carculu cumbinatoriu.
Si disponzat de n cosas e si cherzan, custas cosas, ponner a muntone, e onni muntoneddu siat cumpostu cun k de custas cosas seberadas in tra sas n, e siat k<=n, (k est prus piticu o uguale a n). Su numeru de sos muntones chi si poden acuccurare dipendet de sa leze chi istabilimus e pretendimus chi si rispettet po amuntonare sas cosas. Su carculu cumbinatoriu istudiat comente pesare sos muntones, hamus a narrer cun cales regulas, e contat su numeru de sos muntones pesaos de n cosas a disposizione nostra seberandende k a sa orta.