2.3
Si naran disposiziones semplizes de n cosas seberadas k a k de sas n, unu muntone postu segundu un ordine prezisu chi cuntenet k cosas, e istabilinde chi unu muntone est diferente de aterunu o po sa calidade de sas cosas o po s'ordine de comente fun amuntonadas. Su numeru de sas disposiziones semplizes est carculau prezisu dae sa formula sighente. Si tenzat presente chi su simbulu n! cheret narrer una moltiplicazione de numeros intreos a crescher, a mover de unu finzas a n. E tando sa espressione aritmetica 5! = 1*2*3*4*5 = 120. Sa formula chi est iscritta prus a inantis in custa pazina est una definizione nostra pesada in su limbazu de Mathematica, e luego nde cherimus acrarare su sinnificau. Est una funzione de duos argumentos, n su numeru de sas cosas de sas cales disponimus e k sa numerosidade de sos muntones chi cherimus pesare. Ds est su numene de sa funzione et est unu numene incurzau po disposiziones semplizes. Sa formula n fattoriale dividiu po n diminuiu de kappa totu fattoriale carculat su numeru de sas disposiziones semplizes chi semus chircande. Su sinnificau de totus sas formulas ch’hamus pesare in custos tretos han a esser similares.
Ds[n_,k_]:=n!/(n-k)!
Ds[7,4]
840
Ponimus de haer sas chimbe vocales de s'alfabetu, cantas disposiziones semplizes podimus pesare leandeddas a duas a duas?
{{ae,ai,ao,au,ea,ei,eo,eu,ia,ie,io,iu,oa,oe,oi,ou,ua,ue,ui,uo}}
Ds[5,2]
20
Cantas pandelas tricolores si poden formare cun sos sette colores de s'arcuechelu?
Ds[7,3]
210
Si naran disposiziones cun ripetizione, de sas cosas seberadas a k a k, penzande k intreu, prus piticu, uguale o prus mannu de n, sos muntones pesados cun ordine podende una cosa figurare in su muntone finas a k ortas.
Dr[n_,k_]:=n^k
Dr[4,3]
64
Tirande unu soddu tres bortas cales fun sos risurtaos possibiles?
{{CCC,CRC,CCR,RCC,CRR,RCR,RRC,RRR}}.
Dr[2,3]
8
Tirande tres dados a ses fazes cantos risurtaos possibiles ispettamus?
Dr[6,3]
216