(pro bidere sa fotografia chin sa mannaria sua  ponediche chin su cursore subra 'e sa fotografia chi cheres bidere e abbatiga su buttone 'e manca de su mouse) 

Sos mannos dae part'e mama

Salvadore Cocco    Mamma Canale *

Salvadore Cocco e Mamma Canale * (* chi juilaiant Mesinaju e a sambenadu aiat Cubeddu, duncas su Lumene 'eru fit Maria Cubeddu, ma fit connota coment'e Juanna Canale) sunt sos bisajos dae parte e nonnu Giommaria Cocco e dae parte de nonna Antonina Cocco; ant apidu 5 fizos: mannu Giommaria Cocco, manna Antonina Cocco, tiu Pietrinu, tia Maria Lughia e Tia Juanna. 

Luisi Urru    ??????? Casula

Luisi Urru e ?????? Casula sunt sos bisajos dae parte 'e nonna Caderina Urru 

Giommaria Cocco

Giommaria Cocco; est su mannu 'e sa familia dae parte 'e mamma. Fit de Padria, posca c'at dadu 'orta in Sorgono ue at connotu sa muzere, Caderina Urru. Grande connoschidore de su ortiju at semper tribagliadu boghende e bendende custu materiale. In Budduso' b'at unu monte chi finas in sas cartinas geograficas est jamadu "punta Giommaria Cocco "; paret chi siat istadu su primu a che alciare a sa punta.

Caderina Urru

Caderina Urru; sa manna dae parte 'e mama. Naschida in Sorgono, posca si ch'est andada chin su maridu (Giommaria Cocco) a Pattada. 

Ant apidu 8 fizos;                                            

4mascios:

 4 feminas: 

Sos mannos dae part'e babbu

Tomeu 'e Sini    ?????? ??????

Tomeu 'e Sini e ????? ????? sunt sos bisajos dae parte 'e nonnu Tomeu Era (Sini) 

Salvadore Cocco    Mamma Canale *

Salvadore Cocco e Mamma Canale (Maria Cubeddu) sunt sos bisajos dae parte 'e nonna Antonina Cocco.

Tomeu Era (Sini)

Tomeu Era  (Sini), frailarzu mentovadu, s'est cojuadu a mannu chin Antonina Cocco, sa sorre 'e Jommaria , chi fit assunessi trintannos pius pitzinna de aisse. Como chi est como b'at alu carchi tribagliu fattu sou in bidda (barandiglias, gancellos e ateras operas in ferru battudu). Finas si mannu carchi fizu isse puru si l'at fattu ... 

Antonina Cocco

Antonina Cocco, sorre de Jommaria. Cando s'est cojuada chin Tomeu Era (su sambenadu fit Sini ma lu juilaiant bai in Pattada) jogaiat alu chin sas pupias (aiat pagu pius de 15 annos). Cando si ch'est morta ,in su '64, m'ammento chi istei 5 o 6 dies chirchendela sutta su lettu ca pensaia chi si fit cuada

Ant apidu 8 fizos:

5 feminas:

3 mascios:

*)Pedru, mortu ajaneddu in sa I gherra mundiale)

 Babbu e mama

Tomeucciu 'e Sini

Tomeucciu 'e Sini su mannu 'e domo; naschidu in Pattada in su 1913 s'at  fatu sa segunda gherra mondiale pius duos annos de militare; in gherra s'est immalaidadu de malaria, no reconnota e pro custu trascurada; custu male l'at arriadu de penas sa vida ca posca si 'nd'at beccadu  sa tubercolosi e dae su sessanta at passadu pius tempus fattu ispidales e sanatorios che in domo. S'est cojuadu chin una sorrastra 'e primu gradu, Luigina Cocco . 

Luigina Cocco e Sergio

Luigina e Sergio. De Sergio 'nd'amus a faeddare posca; Luigina est sa manna 'e sa familia; Una femina 'e oro. Resessiat a mandare  addainanti sa familia dae su nudda. At tribuladu tota fida pesende ses fizos, chena  'nd'aer meda in segus. Totu sos chi l'ant connota ant unu bellu ammentu de aissa. Fit dulche, amabile, affetuosa, in pagas peraulas fit una chi  no beniat bene a no cherrer bene. Cojuada chin Tomeucciu si ch'est andada chena dare pensamentu a neune in s'88. 

Ant apidu 6 fizos mascios:

Sos Fizos

Pedru, Juanne, Rino, Sergio e Bruno

Sos frades a criaduras

Pedru e Juanne

Pedru e  Juanne su primu fitmalfusu e abistu. Jighiat sa ojada de unu grodde. Oji 'irde fit unu bellissimi piseddu, seguramente su menzus de sa familia. A 18 annos, posca de aere tribagliadu chin su babbu e-i su tiu (Mimmia) in su molinu, si ch'est andadu disterradu a Germania. Tribagliaiat in sas ferrovias istatales a sos iscambios de sos binario e cue si 'nd'at segadu unu 'e sos poddighes mannos de sa manu. Cojuadu chin Ingrid, in su ' 70 at apidu unu fizu, Marco. Bessidos fora 'e pari chin sa muzere, at suffridu che-i s'amina 'e juda pius che ateru pro sa mancantzia de su fizu. In su 94 si ch'est mortu (Deus beneigat s'amina sua).

Juanne a piciocu fit unu zirabicos; no li piaghiat a abarrare in domo mancu unu minutu 'e pius de su netzessariu e fit cuntentu cando b'aiat ite rundare chin sos amigos; brundu chin duos bellos ojos azurros fit de seguru unu bellu piseddu. Su carattere pius fridu de sos ateros frades 'nde faghet s'inglesu de sa familia; s'est cojuadu chin Bastiana e at duos fizos Antoni e Zuseppe: Como chi est como si agatat sos amigos no li dispiaghet!!! Vivet e tribagliat in Tatari.

Rino, Tonineddu e Sergio

Rino, Tonino e Sergio. Rino est de su '47; at apidu una pitzinnia difitzile ca sos duos frades mannos (Pedru e Juanne) no l'ant atzetadu tantu a coro abertu. At una grande intelligentzia, est de bona grima, cumpanzile, affettuosu e sensibile. Chin su frade Pedru at fatu unu cursu de radiotecnicu e aiat una butteghedda pro acontzare radios e televisores; e in cue si che cheriat Bruno, su minoreddu 'e sa familia, in mesu 'e valvolas e de transistor, e ponzendeche sas manos inue no deviat. Rino ja dae piciocu che fit in Cagliari tribagliende, posca at sighidu a istudiare; ch'est andadu a finire a Carbonia, ue s'est cojuadu chin Flavia; at tres fizos: Tommaso, Manuela e Francesco. Tribagliat in Portovesme, in sa centrale de s'Enel. 

 Sa bonamina 'e Tonineddu, mischinu, est istadu unu piciocu deaberu isfortunadu; Bellissimu, chin sos ojos birdes, s'est immalaidadu a 5 annos e dae tando no b'est jiadu pius. Semper fatu 'e sos ispidales finas chi a 18 annos si ch'est mortu De seguru s'amina sua ch'est in su chelu,'idu chi fit unu angheleddu. 

Sergio est istadu in Pattada finas a sos chimb'annos ebbia (finas a cando no so naschidu eo); posca tia Celestina , chi fit chena fizos, si l'at jitu a Cagliari pro unu mese e dae tando  si l'at muntesu pro sempre. Tzertu chi babbu e mamma devent aere suffertu meda pro custa cosa, pero toccat de narrere chi fint finamentra de bonu coro e pro custu fint cuntentos de aere dadu sa felitzidade a una copia chena fizos. Finas Sergio, pro cantu penso chi sa tia l'apat cherfidu e lu cherfat ancora 'ene, devet aere sufridu meda pro sa mancantzia de s'afettu chi solu Luigina li podiat dare. Ma sa tia l'at pesadu 'ene e como est unu bonu zovanu; vivet in Tempiu, tribagliat in sa banca, s'est cojuadu chin Gerolama e at duos fizos: Matteu e Alessandro.

Bruno. E semus arrividos a su minoreddu 'e sa familia. Bidu chi est finas su chi at bettadu a pare custu zassu, no damus judiscios subra de aisse; una cosa ebbia cheri narrere: ch'istat in Tatari, tribagliat in s'universidade, est cojuadu chin Piera e at duos fizos: Luigina (su lumene de sa manna) e Tomaseddu (su lumene de su mannu).

Torrache a subra        Sos fradiles