Pro cambiare musica abbattiga s'altoparlante

Custa chi so pro bos contare est s'istoria de Luigina, una criadura naschida primidia (a ses meses) chin unu pesu de 620 grammos, pesu chi chest faladu a 490 grammos posca de una chida, chin sa perdida 'e pesu fisiologica

Est un'isperientzia mala ma ajuat a cumprendere maigantas cosas; innantis de totu cantu sunt attacados a sa vida sos piseddutzos dae cando naschent. Como 'nde faeddo unu pagu distaccadu, ma cando ses in cue chin custa criaduredda chi times de isfasciare a la rasciare ebbia, cando iscoberis chi no est posca dediai delicada. Si podet leare in bratzu, si podet carignare, si podet abbratzare... e cando si iscappat a pianghere pro famine o pro carchi doloreddu, tando ti pienat su coro de una pena chi no si podet descriere.  tue cue chi dias cherrere faghere carchi cosa, chi la dias chereere defendere, ma chi nudda podes faghere si no a ch'intrare su bratzu in cussa percighedda de s'incubatrice e a la pibiare su pagu tempus chi ti lassant acurtzu a issa.

E cantu ti dant fele cussos chi comintzant a ti leare peri su ... dae sas primas dies; unu chi bi fit ja' unu mese mi neit: tue innoghe che deves alu morrer! Epuru no b'at cosa chi ti potat istraviare o chi ti potat faghere pensare a ateru. Su pensamentu estsemper cuddu, sias tribagliende, sias in sa buttega fatende s'ispesa o sias in domo pasende. E posca si 'nd'emit s'ora e tando toccat de tuccare in presse a s'ispidale pro approendare sa criadura. Su primu tempus guasi no ti la faghent toccare. Posca, manu manu chi si che colat su tempus, tando si leat in manos, s'abbratzat e, finas si calecunu ti s'isperiat male, si ponet in sa posiscione 'e su canguru (chi paret siat una meighina menzus de sas meighinas ufficiales, ca su 'e essere acurtzu a sa mama o a su babbu sa criadura l'intendet e comente). E cantu ti faghian penare cussas criaduras che a fiza tua chi 'idiat sos suos, si l'andaiat bene, una o duas bias su mese. Ca cando che ses intro 'e cue, paret chi totu ti siant fizos; t'ataccas a totucantos sos pupiteddos, los connosche a unu a unu a lumene e a sa chiza. Si calecunu istat male, istas male tue puru.  

Torrache a subra